occitan-aude.over-blog.com

MANIFESTACION PER L’OCCITAN AQUESTE DISSABTE A CARCASSONA

28 Mai 2021 , Rédigé par Mirelha

MANIFESTACION PER L’OCCITAN

AQUESTE DISSABTE A CARCASSONA

Entre una lei en favor de las lengas regionalas votada amb una brava majoritat, la censura del Conselh constitucional, un Ministre de l’educacion fièr coma un pavon e lo President de la Republica que proclama un amor grandàs per aquelas lengas, una gata i trapariá pas mai sos…gatons !

Lo Collectiu Per Que Viscan Nòstras Lengas, que recampa las associacions de las lengas de França, vòl faire d’aqueste dissabte 29 de mai una granda jornada de sosten popular.

A Carcassona, Calandreta, lo Cercle Occitan, lo CREO, Fasètz la Lenga en Cabardés e l’IEO-Aude lançan una crida per un recampament a 11 h del matin, al jardin Gambettà, davant lo Musèu.

I aurà de jaune e de roge, unes cants (amb lo grope vocal Cossí Que Siague), unas presas de paraulas per la reconeissença dels dreits de las lengas minoritàrias e l’obtencion de garantidas dins l’ensenhament, dins la difusion artistica, dins los mèdias e dins la vida vidanta.

Las ciutadanas e los ciutadans, las elegidas e los elegits, los responsables d’organizacions son convidats a prene part a aqueste rendètz-vos pel pluralisme linguistic e la biodiversitat culturala.

Contact : ieo11@ieo-oc.org

• Autres rendètz-vos audencs :

- Carcassona, escòlaBerthelot, divendres 28, a 17h : fòto escolans/parents/ensenhaires

- Narbona : rendètz-vos dissabte a 10h30 a l’Ostal Occitan

- Pradèlas del Val : presa de paraula (18h) en dobertura del Total Festum-Val de Danha.

- Sijan : rendètz-vos dissabte a 10h davant la Calandreta Lo Becarut

- Menerbés : los parents de la Calandreta Cascamèls rescontran los conses de Felinas (9h), Traussan (9h30), Rius (10h)

- …

Fòto Joan-Loís Fabre

L’ADIEU AL ROBÈRT MARTÍ (mai de 2021)

8 Mai 2021 , Rédigé par Mirelha

L’ADIEU AL ROBÈRT MARTÍ

Lo Robèrt Martí nos a quitats aqueste dimècres 5 de mai. L’occitan pèrd un de sos grands obrièrs.

Militant cultural, foguèt d’annadas lo president eficaç de l’Institut d’Estudis Occitans. Menèt en particulièr una accion bèla per la professionalizacion de las edicions de l’associacion, amb la mesa en plaça d’IDECO. Noiriguèt la revista Occitans ! de son seguit de l’actualitat dins d’editorials que picavan just. Lo tot sens daissar de caire una òbra escrita personala de qualitat. Butèt a la ròda per la dobertura de l’Ostal Bodon.

Per plan de monde, èra conegut jos son escais d’artista comic : Padena. La berreta sul cap, una blòda e l’aire pèc e aluserpit a l’encòp, exercèt son talent dins son restaurant La Grépia abans de córrer los emponts de tota Occitania per combatre per la fòrça del rire la malasòrt que ne patisson nòstra lenga e nòstra cultura.

Militant engatjat dins la vida sociala e politica, sapièt metre en abans lo ròtle de Puèglaurenç per installar Marianna coma simbòl popular de la Revolucion e de la Republica. Doblidarem pas tanpauc sa dobèrtura sul monde, los ligams fòrts amb Catalonha, mas tanben amb los Indians e plan d’autres.

Robèrt a escrit paginas bèlas de l’accion occitana : a nosaus de plan saupre faire virar e virar encara paginas novèlas.

L’Institut d’Estudis Occitans-Aude fa part de tota son amistat e son sosten a Josiana, a sa familha e a sos amics. (fotografia Domenja Lekuana. Universitat occitana d'estiu, La Grépia 2010)

LO TEMPS DE LAS CERIÈRAS

5 Mai 2021 , Rédigé par Mirelha

LO TEMPS DE LAS CERIÈRAS

• 2 concèrts de Nadau a Esperasan, lo dissabte 22 e lo dimenge 23 de mai.

Totas las entresenhas :

https://www.ladepeche.fr/2021/05/02/pas-un-mais-deux-concerts-de-nadau-les-22-et-23-mai-a-esperaza-9521272.php

• RENDÈTZ-VOS OCCITANOCATALAN A PUÈGVERD PEL DILUNS DE PENTACOSTA

Cants e poesia d’Occitania e de Catalonha vos balhan rendètz-vos a Puègverd per aqueste diluns de Pentacosta (24 de mai) al Musèu de Quercòrb amb Paulina Kamakina e lo Carola Ortiz trio.

Al Musèu de Quercòrb, l’associacion La Claranda (en partenariat amb l'Institut d'Estudis Occitans-Aude quetendrà un taulièr de libres e prendrà part als escambis amblo public) vos prepausa un temps de respiracion amb un rescontre dins lo vergièr de l’establiment. Poiretz, a cinc oras del vèspre, escotar las lecturas de la poetessa occitana, Paulina Kamakin aabans lo recital del Carola Ortiz triò.

Aqueles moments marcan lo rescontre de doas femnas, lo rescontre de doas lengas e de doas culturas cosinas (l’occitana e la catalana) e l’expression de poesias contemporanèas femininas e feministas.

A cinc oras, Paulina Kamakina posarà tèxtes dins son antologia« Paraulas de Hemnas ». A la mièja, un moment d’escambis amb lo public vos balharà la paraula. A 6 oras, plaça a Carola Ortiz que presentarà sas creacions e sa mesa en musica de poèmas d'escrivanas catalanas en teissent un univèrs que mescla melodias miègterranèas, musicade cambra, percussions, ritmes folclorics e unas armonias de jazz.
• Las consignas sanitàrias en vigor seràn respectadas ; en consequéncia, lo nombre d’espectators es limitat : val mai reservar04.68.74.38.05 o resa@laclaranda.eu(tarifa: 12€ / 8€ redusit / res-non-còsta pels- de 15 ans ; replegament jol cobèrt se plòu)

• Aquesta manifestacion artistica serà presentada dins l’emission Als 4 Ventsde RCF-País d’Aude, difusada lo diluns17 de mai (11h30) e lo dimars18 (19h30), dins un entreten amb Lisa Frendo (La Claranda).

• Ne saber mai :

- organizacion del 24 de mai : https://laclaranda.eu/programmation/36/concert-et-lectures-entre-poesies-feminines-catalane-et-occitane

- Carola Ortiz : https://carolaortiz.com