/image%2F0692203%2F201307%2Fob_4a4629c514317bd0331e885ab787edb4_ostal.JPG)
SASINA DEL CONSELH CONSTITUCIONAL
SASINA DEL CONSELH CONSTITUCIONAL
Es malurosament sens suspresa qu'avèm apresa la sasina del Conselh Constitucional per un seissantenat de deputats de la majoritat En marcha, butats pel ministre de l'Educacion, aprèp l'adopcion per l'Amassada nacionala de la lei per la proteccion patrimoniala de las lengas regionalas e lor promocion.
La nauta autoritat dispausa de tres meses per rendre son verdicte : validar lo tèxte dins son entièr o invalidar unes articles.
Los promotors de la lei e las associacions occitanas esperan que l'instància constitucionala sauprà rebutar lo recors per respondre atal al vòte clar dels parlamentaris e a la larja demanda populara formulada per sortir França de son agach fregeluc e despassat sus l'expression de las lengas de França e sus la biodiversitat culturala.
L'IEO-Aude convida aderentas e aderents, amigas e amics de s'associar a las accions que mancarà pas de metre en plaça lo Collectiu Per Que Visquen Nòstras Lengas.
* Un Als 4 Vents sus la lei Molac
• Sus RCF-Pays d’Aude :
- Als 4 Vents : cada setmana, una emission occitana de 25 minutas : lo diluns, 11h30 ; redifusion : dimars, 19h30 sus RCF-Pays d’Aude : Carcassona : 103 ; Castèlnau d’Ari : 89,3 ; Lesinhan : 103 ; Limós 87,7 ; Narbona : 98,2 : St-Peire de la Mar : 98,2 ;
o mercé a https://rcf.fr/programmes/programme/RCF11
Emission de tornar trapar en podcast :https://rcf.fr/vie-quotidienne/als-4-vents
Aqueste diluns 26/04 : Lo vòte del dijòus 8 d’abril
- Rendut-compte de la jornada
- Communiqué de Paul Molac
- Reaccions d’Occitania al vòte de la lei.
- Illustracions musicalas en : breton (Gavoten Paul Molac), basc (Hegoak, per Vox Bigerri), còrse (Parlemu corsu), catalan (Maria del Mar Bonet) e occitan (La Talvera).
- L’emission es represa sus Ràdio-Lenga d’Òc-Narbona : lengadoc.eu
DIJÒUS 8 D’ABRIL UNA DATA ISTORICA PER L’OCCITAN E PER LAS LENGAS DE FRANÇA
DIJÒUS 8 D’ABRIL
UNA DATA ISTORICA PER L’OCCITAN
E PER LAS LENGAS DE FRANÇA
L’IEO-Aude exprimís son contentament aprèp l’adopcion de la proposicion de lei per la proteccion patrimoniala de las lengas regionalas e lor promocion, portada pel deputat breton Paul Molac.
L’associacion merceja grandament las doas deputadas e lo deputat d’Aude qu’an balhat un vòte favorable e confòrme al tèxte votat pel Senat. An sauput respondre a las demandas dels ciutadans e del territòri e s’opausar a l’atituda negativa e a la marrida fe del ministre de l’Educacion e de lor formacion politica. Na Hérin es intervenguda lo 31/03 a la sesilha de la Comission Cultura e En Perea a la sesilha plenièra.
En ligason amb las associacions occitanas e lo collectiu Per Que Visquen Nòstras Lengas, l’IEO-Aude a pres sa part a la mobilizacion e a la mediatizacion :
- relacion amb los elegits : corrièrs e escambis amb los deputats long del procèssus ; rendètz-vos vidèo conjunt amb Calandreta amb Na Hérin ; proposicion de corrièrs personals de mandar als elegits.
- mandadís d’una letra d’informacion quotidiana PQVNL-IEOAudedempuèi lo 17 de març, al rasal del Jornalièr Audenc.
- crida (seguida) a la participacion al clip de l’umorista breton Simon Cojean : Daissa-nos parlar Joan-Miquèl(de veire : https://www.youtube.com/watch?v=fCLYA8YemgA&t=312s).
- distribucion del papafard Sauvons les pingouins et les baragouins a la manifestacion per la Lei Climat (dimenge 28 de març).
- mediatizacion : articles dins La Semaine du Minervoise Le Petit Journal de l’Aude ; entrevistas sus : Ràdio-Lenga d‘Òc-Narbona, Ràdio-Lenga d’Òc-Erau, RCF-Pays d’Aude : (https://www.facebook.com/watch/live/?v=2863453720591239&ref=watch_permalink)
L’IEO-Aude merceja tanben los Conselhs municipals d’un vintenat de comunas del departament que, dempuèi decembre, an votat una mocion de sosten per l’ensenhament de l’occitan al licèu (http://www.felco-creo.org/01-12-20-des-elus-locaux-sengagent-contre-la-reforme-des-lycees/).
Lo vòte d’aqueste dijòus es una plan bona causa, mas lo cal tradusir ara dins la realitat. Cal comptar amb la promulgacion, un possible recors al Conselh Constitucional, las pressions de faire per la signatura de Convencions Estat-Region per l’ensenhament, las mesas en practica al nivèl departamental (amb mai de concretizacions de l’Esquèma departamental) o local,… Sèm pas al cap del camin,mas sèm en camin !Cal contunhar de demandar e d’obténer laratificacion de la Carta europèa.
L’IEO-Aude compta sus sas aderentas e sos aderents e sus totas las amigas e los amics de la lenga d’Òc per obrar a una preséncia dinamica de la lenga e de la cultura occitanas dins la vida vidanta de la societat. L’IEO-Aude acompanharà totas las iniciativas dins aquel sens e serà al rendètz-vos (coma sapièrem metre sus pè las manifestacions Anem Òc !De 2005 e 2009).
Per l’ora, vos convidam a festejar lo vòte d’aqueste dijòus 8 d’abril amb un còp a beure… virtual.
