DIVENDRES 2 DE MAI : SERADA OCCITANA A PUÈGNAUTIÈR

Dins l'encastre de la Prima medievala de Puègnautièr, una serada occitana en tres moments se debanarà aqueste divendres 2 de mai.

D'en primièr, a 6 e mièja del vèspre (sala Na Loba, dintrada liura), Miquèla Stentà parlarà de la situacion de las femnas occitanas a l'Edat mejana. De qué sabèm de las femnas e dòmnas occitanas als temps quiets, puèi dins los trebolums de la Crosada e de l’Inquisicion? Perdelà las representacions masculinas, tan plan dins los tèxtes coma dins los imatges, lor plaça dins la societat apareis primordiala : de la dòmna protectritz e inspiratritz dels trobadors a la bona femna catara passant per las trobairises e las que prenon part a la defensa de las vilas assietjadas, las femnas d'Òc marcan aquel temps passat.

A 8 oras de la nuèit, serà possible de manjar un bocin amassa (10 €, sus inscripcion : ieo11@ieo-oc.org o 04 68 25 19 78)

A 9 oras de la nuèit, Miquèl Decòr, acompanhat per l'acordeon de Gregòri Bardou, montarà sus la scèna de Na Loba (dintrada liura) per faire sautejar los mots de sos poèmas dins una lectura dinamica : Valsa la lenga ! Lo poèta posa dins sos recuèlhs (Lo pastre de paraulas, Passejada menerbesa, La camèla blanca,..) una inspiracion de simbiòsi entre los òmes e la Natura sus las ribas de la Mar nòstra, ont la garriga de menerbés respond a las sablas de Saarà o d'endacòm mai per traçar los camins e las dralhas entre memòria e espers amb la fraternitat e la solidaritat cavilhadas al còr.

Se tornarà trapar los dos intervenents de la serada sus la scèna de Na Loba per la creacion de « La controvèrsia de Puègnautièr » lo dimècres 28 de mai que ven.