Febrejadas 2023 e Cafè-òc a la Barbacana
LAS FEBREJADAS DE 2023
pintura, literatura, natura, espòrt e cançons
del 20 al 26 de febrièr
Colors, corrièrs, mèl e abelhas, rugbí e cançons son al programa de las Febrejadas, setmana d’animacions mesa sus pè pel Cercle Occitan del País de Carcassona e l’IEO-Aude.
Tres rendètz-vos se tendràn a l’Ostal Sirventés (79, la Trivala, a Carcassona) a 6 e mièja del vèspre (dintrada liura) :
- diluns 20 de febrièr : estrena de la mòstra de pinturas de Robin Chouleur, consacrada a la luta de Larzac
- dimècres 22 : conferéncia de Ròsa Blin-Miòch sus la correspondéncia entre August Forés e Lidia Wilson-de Ricard
- divendres 24 : rescontre e tasta amb l’abelhaire Danís Fize.
Lo quatren rendètz-vos serà mai original : se tendrà a l’estadi Domèc, dimenge 26, amb un recital de Cristian Almerge, autor de la cançon Los Canaris de Carcassona,aprèp la partida del campionat de XIII : Carcassona-Tolosa (jol tibanèl, cap a 17h30).
PRIMIÈR CAFÈ-ÒC A LA BARBACANA,
LO DIJÒUS 2 DE MARÇ
Cafè-Òc : La tòca d’aquestes rencontres es de permetre a cadun, qué que siá son nivèl de lenga, d’èsser dins un banh linguistic, d’ausir, de comprene la lenga, d’ensajar de la parlar, e pauc a chapauc de la parlar.
La serada prendrà la fòrma siá d’una charradissa a l’entorn d’un tèma causit pel grop lo còp d’abans, siá de pichonas lecturas, intervencions variadas, contes, devinhòlas, peçòtas menadas per los que ba pòdon e ba vòlon. E totjorn, plaça a la paraula de cadun, cadun a sa mesura.
Avètz la lenga « a l’òrle dels pòts », trefosissètz de la poder daissar venir ? Alavetz, retrobatz-nos lo primièr dijòus del mes a l’ostal del barri « BarbaTri », carrièra Barbacana, a 18 oras 30 (al n° 78, a dos passes de la Calandreta).
La serada s’acabarà, partejant un pichon quicòm a beure o a manjar, menat pels membres del grop.
La sola obligacion, per los que decidirián de participar, seriá de venir sòci de l’ostal del barri, per la modica carga de dètz èuros per an.
Benvenguts.udas a tot.es.as, occitan.s.as de causida, de còr o de raices.
Lo primièr Cafè Òc se tendrà lo dijòus 2 de Març a sièis oras e mièja del vèspre (amb lo sosten del Cercle Occitan del País de Carcassona e de l'IEO-Aude).