NÒVAS DE GENIÈR de 2021

NÒVAS DE GENIÈR

• LA BONA ANNADA

L’Institut d’Estudis Occitans-Aude vos desira a totas e a totes la melhora annada 2021 que se pòsque e vos convida a contunhar d’obrar amb nòstra associacion a la coneissença, la promocion e l’espandiment de la lenga e de la cultura d’Òc.

• BODON-100 ANS

Per marcar los 100 ans de la naissença de Joan Bodon (11/12/1920), l’IEO-Aude elaborèt 22 fichas per parlar de l’òme, de son òbra, dels documents sus el (libres, CD, films) que foguèron mandadas coma suplement al Jornalièr Audenc, long del mes de decembre.

Aquestas fichas son estadas recampadas dins un dossièr (mercé a la Maria-Joana Verny) que podètz consultar (e/o telecargar) en linha sul site de l’IEO-Region Occitania-Pirenèus-Mediterranèa :

https://ieo-opm.com/joan-bodon-100-ans/

• PAS D’IVERNALAS DE CABARDÉS

Las decisions governamentalas de manten de la barradura de las salas d’espectacles an menat l’IEO-Aude e lo Servici Cultural de Puègnautièr a anullar los dos rendètz-vos programats de l’edicion de 2021 de las Ivernalas de Cabardés : lo moment contes e cants Arièja, mon país de Pascala Respaud (Revelhet) lo dimècres 20 de genièr e la representacion d’Istòrias (TIO-La Rampa), lo dissabte 23 de genièr.

Ensajarem de tornar programar aquesles espectacles, mas ne sèm a la quatrena anullacion de manifestacion a Puègnautièr : Setmana de las Sabors, Setmana de la Paraula e recital Saga-Nadal.

• AMPELOFOLIÁS DE CABARDÉS (dimenge 24/01)

Coma un aire d’Ampelofoliás ongan, aqueste dimenge 24 de genièr, de matin e de vèspre, a Mossolens.

Version regropada sus la plaça del Calcadís amb lo mercat de las trufas negras, mercat del terrador e d’artesanat (L’IEO-Aude tendrà un taulièr : libres, masquetas,…).

Ongan, la venda de las trufas se fa d’un biais contunh a comptar de 9 e mièja del matin.

La sonorizacion reprendrà las musicas dels grops qu’animèron los passa-carrièras las annadas passadas.

Venir a Mossolens aqueste dimenge 24 de genièr es un gèste d’amistat e de solidaritat, la marca de la volontat de contunhar de faire viure lo país !

Serà pas possible de beure e manjar sul camp de fièra, mas podètz reservar platèus-repais trufats que manjaretz tranquillament a l’ostal (aprèp aver crompat una(s) cantinas de vins de Cabardés). Al menut :

Ensalada d’endévia trufada – Tòstas de burre trufat – Meleta trufada – Fromatge (Brie) trufat – Ris al lait trufat – Pan.

15 €, lo platèu - Pagament a la reservacion (chèc a l’òrdre Ampélofolies du Cabardès).

Reservacion alprèp de Maria-Cecília Micouleau : 0468249663 o 0688863950

ampelofoliesducabardes@live.fr ; ampelofolies.over-blog.com