Una brava dimenjada / un super week-end !

 UNA BRAVA DIMENJADA

Vaquí una brava dimenjada que s'anóncia amb :
- las Ivernalas de Cabardés, a Puègnautièr (divendres 25 e dissabte 26 de genièr)
- las Ampelofoliás de Cabardés (del 25 al 27 de genièr)
- la Dictada Occitana a Narbona (dissabte 26)

LAS IVERNALAS DE CABARDÉS de 2019

a Puègnautièr/Pennautier

divendres 25 de genièr

- a 18h30, sala Na Loba : Malika Verlaguet ditz los Mormolhs del Codolet (jove public). Participacion liura.

Malika Verlaguet torna trapar sas rasigas occitanas per viatjar sus las alas dels aucèls de passatge e dobrir lo portanèl dels òrts de l'imaginari. 
Los uèlhs emplenats de la vida del monde, barreja las dralhas de las originas en reviscolant les contes populars. Los servís d'una votz risolièra, especiats dels mots dels poètas e dels païsans.
En occitan e en francés, vos daissaretz tocar del cap dels mots ! 
Los mormolhs del codoletcontan qu'unes peisses parlan : « Ba sabiái pas abans de m'arrestar en riba del riu e de prene un codolet dins la man, un codolet lis e doç. E çò que me contèt, l'ai gardat amb ieu… Los contes an seguit lo camin de l'aiga e, per la boca del peis ont se mesclan las lengas, convidan a se daissar portar pel corrent dels imaginaris. »

dissabte 26 de genièr

- a 19 h, sala Na Loba : Florant Mercadièr ditz sos Contes de Garona
- 20h30, sala de la Tor : sopar convivial a l'entorn d'una blanqueta de vedèl, en ligam amb las Ampelofoliás de Cabardés.

• Tarifa : espectacle : 5 € ; sopar : 15 € ; espectacle + sopar : 18 €.Inscripcion obligatòria : 04.68.25.19.78 o ieo11@ieo-oc.org

Posant dins sas raices occitanas e dins sos viatges a travèrs lo monde, lo Florant Mercadier inventa d’istòrias d’imaginari mestissat e d’umor irresistible…
Tirats « del Placard », sortits « del país de Qui-sap-ont » o dormissent « entre doas aigas de Garona », sos contes  donan vida a de personatges saboroses. Sus l’empont, lo Florant Mercadier se fa tanben musician, s’acompanha amb la sansònha, la bodega o l’armonicà…
A Puègnautièr, nos dirà (en occitan e en francés) sos Contes de Garona, de Pirenèus fins a la Mar nòstra, e rescontrarà princessas de las Espanhas, farfadets trufets, nòtas de musica, posca dels camins, barcas sus l'aiga,…
• Las Ivernalas de Cabardés, aquò's un rendètz-vos organizat per l'Institut d'Estudis Occitans-Aude
amb lo sosten de la Comuna de Puègnautièr, del Conselh Departamental d'Aude e de l'Ofici Public per la Lenga Occitana,
amb la participacion de las Ampelofoliás de Cabardés, del Cercle Occitan del País de Carcassona, de la Calandreta de Carcassona, de Ràdio-Lenga d'Òc-Narbona e de RCF-Pays d'Aude.

LAS AMPELOFOLIÁS DE CABARDÉS

Totas las informacions sul debanament :http://ampelofolies.over-blog.com

L'IEO-Aude ten un taulièr, sala Émilien-Combes, long de la jornada de dimenge a Mossolens.

LA DICTADA OCCITANA A NARBONA

Dempuèi ongan tretze ans, lo Cercle Occitan de Narbona organiza, lo darrièr dissabte de genièr (doncas lo 26 per ongan), e coma dins un quarantenat de vilas d'Occitania e de França (Albi, Arlas, Castras, Foix, Nimes, Paris e ne passi) e mai dels Païses Catalans (Barcelona, Valencia) una "dictada" en occitan, espròva acompanhada d'una animacion musicala ambe la preséncia de nòstre taulièr amb un molon de libres, CD, DVD e autras besucariás occitanas. Aquò pr'amor de defendre la Lenga Nòstra e nòstre biais de viure.
Ongan encara es la Salle des Foudres du Domaine de Montplaisir à Narbonne que nos aculhirà, tre 14 h e l'animacion serà un còp de mai assegurada per Ràdio Lenga d'Òc.

Del temps que se corregirà la dictada, lo CerÒc pagarà un vespertin als participants.
Seriam fòrça contents de vos véser o de vos tornar véser a-n aquela Dictada, descontractada e festiva a l'encòp.
Un farnat de prèmis per cada categoria : adultes, liceans, collegians e mainatges del primari, son ofèrts pel Cercle, sos partenaris e los mercands de Narbona.
La manifestacion es sostenguda per la Ville de Narbonne.

Contact / per se marcar :                             

04 68 41 15 71 / 06 78 02 10 99 / lucie.maffre@wanadoo.fr ; www.cercle-occitan-narbona.fr