Febrejadas de 2018 / en Février 2018

LAS FEBREJADAS DE 2018 (19-23/02)

A l'Ostal Sirventés (79, la Trivala a Carcassona), l'IEO-Aude e lo Cercle Occitan del País de Carcassona vos convidan a tres rendètz-vos per las Febrejadas de 2018 que se tendràn en fin de vèspre (a 6 oras e mièja) :

- diluns 19 de febrièr : presentacion de la mòstra Meli & Zeli, mesa sus pè per Laurenç Malard a partir dels dessenhs umoristics d'actualitat locala de la debuta de las annadas 1990 a Carcassona (dessenhs : Jicé ; tèxtes : Ramon Gogaud), acompanhada d'una lectura de tèxtes de Ramon Gogaud, tirats de son recuèlh de novèlas Mon barri.

- dimècres 21 de febrièr : presentacion de l'obratge sus Malapèira, paregut fa gaire, per l'equipa de Vilatges Al País : La Malepère, entre malédiction et bénédiction, un pays authentique.

- divendres 23 de febrièr : un moment-contes amb lo Bernat-Contaire (Bernat Bergé) (participacion liura, en sosten a l'Escòla Occitana d'Estiu).

Lo Bernat-Contaire fa seguir dins sa saqueta un molon de contes trapats pels camins d'Occitania : contes pescats dins Garona, contes mormolhats pels vents dins las vals pirenencas, contes montats dins la nuèit del fin-fons de la tèrra, contes tombats de las estelas, contes amassats dins lo rosal de l'alba, contes d'ièr e de uèi, contes de totjorn, contes meravilhoses, contes per ire o per plorar, contes per venir avisats, contes fòls, … Sètz convidadas e convidats a una passejada bèla suls camins de la mementa e de l'imaginari.