Overblog
Editer l'article Suivre ce blog Administration + Créer mon blog
occitan-aude.over-blog.com

IVERNALAS DE CABARDÉS DE 2018 / Les Hivernales du Cabardès

15 Janvier 2018 , Rédigé par Mirelha

IVERNALAS DE CABARDÉS DE 2018

Dos jorns e tres rendètz-vos
los 27 e 28 de genièr, a Puègnautièr

Las Ivernalas de Cabardés, a l'iniciativa de l'IEO-Aude e del Servici Cultural de Puègnautièr, vos balhan tres rendètz-vos lo divendres 26 e lo dissabte 27 de genièr :

- un espectacle jove public, lo divendres 26, a 18h30, sala Na Loba : Quesaquò e Mascomprés, interpretat pel Teatre TIO-La Rampa (participacion liura)
- un espectacle d'umor, lo dissabte 27, a 19h : L'Occitanie pour les Nuls, per Florant Mercadièr
- una taulejada amicala, en ligason amb las Ampelofoliás de Cabardés, lo dissabte 27, a 20h30 (sala de la Tor) (espectacle : 5 € ; sopar : 15 € ; espectacle e sopar : 18 € ; sopar sus reservacion : 04.68.25.19.78 o ieo11@ieo-oc.org)
 

QU'ES AQUÒ ?

L'espectacle jove public met en preséncia lo curiós Quesaquò e lo cercaire Mascomprés, seguits pel pichon Marchadedins. Aiman los tres d'escotar las istòrias coloradas del Chivau drapèu. Fàcia a aqueste monde colorat de blau, de verd, d'irange…, se trapa un monde tot gris ont senhoreja lo Glomi, qu'aima pas brica las istòrias, que vòl pas somiar e desira tot uniformizar, numerotar, racionalizar… L'afar se nosarà a l'entorn d'un cariolet multi-foncional !
L'espectacle es jogat pel Joan-Loís Blenet (autor del tèxte) e l'Ives Durand que pòrtan tot lor biais de comedians e contaires al vam d'una pèça ritmada, risolièra e creativa.

IVERNALAS DE CABARDÉS DE 2018 / Les Hivernales du Cabardès

AVÈTZ DIT OCCITANIA ?

L'an passat, lo public aviá presat los contes sortits del placard pel Florant Mercadièr. Lo contaire torna ongan amb sa creacion recenta : L'Occitanie pour les nuls ? La tòca es de contar l'istòria d'Occitania, la pichona e la granda. Lo Florant s'ajuda de musica, d'umor e d'una bona dòsi de marrida fe per avançar una autenticitat segura que trasformarà la vision de cadun sul passat del país d'Òc. Aprendretz atal cossí los trobadors inventèron lo rap, l'òme tarrible qu'èra Gaston Febus autor de la doça cançon del Se Canta,… Lo contaire s'amusa e vesita los contes e legendas que farguèron aquel territòri original entre doas mars e tres montanhas.

IVERNALAS DE CABARDÉS DE 2018 / Les Hivernales du Cabardès

A TAULA

A la fin de l'espectacle, se poirà passar a taula que lo rendètz-vos Ivernalas fraireja amb las Ampelofoliás e permet un rescontre a la velha de la granda jornada de fèsta de la trufa negra e dels vins de Cabardés lo dimenge 28 a Mossolens. Un repais convivial amb un plat occitan que ten al còs (sautat de pòrc acompanhat de patanas), los vins de Cabardés e lo muscat de Sant-Joan de Menerbés.

 

UN BRAVE RENDÈTZ-VOS

Las Ivernalas de Cabardés son organizadas per l'IEO-Aude e lo Servici Cultural de Puègnautièr, amb lo sosten del Conselh Regional Region Occitania-Pirenèus Mediterranèa, del Conselh Departamental d'Aude, de la Comuna de Puègnautièr, de l'Ofici Public per la Lenga Occitana en collaboracion amb lo Cercle Occitan del País de Carcassona, la Calandreta de Carcassona e las Ampelofoliás de Cabardés.


LO DIMENGE 28 A MOSSOLENS

E dimenge 28, serà la granda jornada de las Ampelofoliás de Cabardés amb lo mercat del terrador, lo mercat de las trufas, un fum d'animacions… L'IEO-Aude i tendrà taulièr e l'animacion musicala serà assegurada per Tonton a Faim e la Fanfara dels Golamàs.

---------------------------
Per nos contactar :

Ostal Sirventés :
ostal.sirventes@wanadoo.fr ; ieo11@ieo-oc.org
04 68 25 19 78
occitan-aude.over-blog.com
Adreiça novèla : IEO-Aude BP 51042 11860-Carcassona Cedex

Partager cet article
Repost0
Pour être informé des derniers articles, inscrivez vous :
Commenter cet article

Estada Michèle 15/01/2018 12:37

Joli programme on se verra aux Ampélos