RENDÈTZ-VOS D'OCTOBRE AMB LOS COMPANHS DE PARATGE

L’associacion dels Companhs de Paratge (http://compagnonsparatge.blogspot.com/) s’interèssa a las relacions de l’istòria amb l’actualitat dins lo mond occitan e mediterranèu. En aqueste mes d’octòbre, prepausa tres rendètz-vos en tèrra d’Aude.

---

Del gran al pan…
D’en primièr, lo divendres 13 d'octobre, a 6 e mièja del vèspre, a la librariá Mots & Cie de Carcassona (35, carrièra Armanhac), se tendrà un rescontre amb lo molinièr-fornièr de Cucunhan, Rotland Feuillas, a l’escasença de la sortida de son libre d’entreten amb Joan-Felip Tonnac : À la recherche du pain vivant (Actes-Sud) http://www.actes-sud.fr/catalogue/cuisine-et-gastronomie/la-recherche-du-pain-vivant
 
Una jornada suls vents e suls molins
Lo dissabte 14, es una jornada de rescontres qu’es organizada en Cabardés a Mossolens a l’entorn dels vents e dels molins.
De matin, se parlarà dels molins en Cabardés (amb Gérard Dellús e Joan-Claudi Caperà, de l'associacion Patrimoines, vallées des Cabardès) e en Lauragués (amb Pèire Mercié https://fr.wikipedia.org/wiki/Discussion:Pierre_Merci%8E ). Aprèp lo dinnar (reservar : 15 € alprèp d'ostal.sirventes@wanadoo.fr), Mirelha Braç e Alan Roch contaràn los imatges del molinièr dins las cançons, los contes e los provèrbis d’Occitània (“Lo molinièr que passa de farina… Lo molin de Cantarana quand a de grana…”). 

Josiana Ubaud http://www.josiane-ubaud.com/
clavarà la tièra de las intervencions amb una evocacion del lexic dels vents en Occitania e promet “un revolum de mots e de dires”.
Aprèp aqueste temps de discussion, lo contaire Joan-Jaume Delpotz vendrà dire qualques contes (a 5 e mièja del vèspre ; pels pichons e pels grands ; dintrada liura) al ritme de las alas del molin, de l’ase del molinièr e de la virada del Cèrç.

La Crosada en Lauragués
Dijòus 19 d’octòbre, a Vilaspin (Sala de las Fèstas, 6 e mièja del vèspre), Joan-Loís Gasc evocarà las batalhas del temps de la Crosada contra los Albigeses que se debanèron en Lauragués. Aquesta intervencion serà illustrada per la lectura dels tròces de la Cançon de la Crosada sus aquestes eveniments: una lectura en tres versions : occitan medieval (Miquèla Stenta), occitan modèrne e francés (Mirelha Braç e Alan Roch).

---------------------------
Per nos contactar :
Ostal Sirventés :
ostal.sirventes@wanadoo.fr ; ieo11@ieo-oc.org
04 68 25 19 78
occitan-aude.over-blog.com
Adreiça novèla : IEO-Aude BP 51042 11860-Carcassona Cedex