Segonda setmana de la quinzenada « Fasètz la Lenga en Cabardés-2017 »

Dimars 28 de febrièr a Ventenac de Cabardés, plaça a la Taulejada. Cada annada, un grop de valents benevòls se copa en quatre per preparar un repais de primièra, inspirat per las recèptas del país occitan. Aquesta annada, èra vengut lo torn de la « Mongetada », plat tradicional d'ivèrn, a basa de mongetas, de codenas e de confit de guit, amb tanben de salsissa cuèita a despart. A Carcassona, se fasiá la mongetada abans d'anar jutjar Carcassús (lo Rei del carnaval) e, plan segur, de lo condemnar a la cremacion, als crits de : « Al fuòc ! Al fuòc ! ».
Una ensalada plan garnida de cebas, pomas, crostets, puèi la mongetada servida tant que ne podiás engolir, e las aurelhetas dauradas preparadas per l'equipa de Fasètz. Lo tot servit amb los vins de Cabardés e acompanhat per la musica del grop Tarabastar (https://www.facebook.com/Tarabastarfanfare/?hc_ref=PAGES_TIMELINE ) (una formacion d'Aude de recomandar !). La foliá ganhèt los « taulejadaires » que se metèron a dançar per dire de far davalar la mangiscla... Una equipa de França-3-Montpelhièr demorèt tota la serada e faguèt onor al repais e a las danças.

La Taulejada

Dimècres 1èr de març, Quina a Argon : « E al primièr... ». Un fum de lòts foguèron ganhats, tanplan un viatge de Fasètz o unes repaisses dins dos bons restaurants de Cabardés, coma de libres en occitan, de vins, de consèrvas de qualitat, de plaças per las partidas de l'ASC e del VARL, e tot çò autre... Fòrça ganhèron pas res, mas l'ambient èra talament agradiu qu'òm se n'anèt amb l'espèr de ganhar l'an que ven...

La Quina

Divendres 3 de març, a Mossolens : Abans los contes, una seria impressionanta de sopas : sopa al jalverd, a las castanhas e a la cogorda, una garbura, de lentilhas, de caulet-flòri, una aiga-bolhida, de velosats mai doces que lo velós... e ne passi. Puèi, venguèron los Contes de Maria-Odila Dumeaux. « Un còp èra... », una polida sala per aculhir la contaira venguda del país de las prunas qu'encadenèt una cordelada d'istòrias, de devinhòlas o de vira-lengas... Una brava serada qu'auriá poscut durar fins a la fin de la nuèit... (http://garamiaou.blogspot.fr)

Los Contes de la Maria-Odila

E per acabar, dissabte 4 de març a Vilaganhenc, en apoteòsi final : las polifonias de Corou de Berra, de Niça la Bèla, venguèron encantar lo public bèl que ne demandèt encara e encara... (http://www.coroudeberra.com/topic/index.html)

A l'an que ven !

Corou de Berra