Overblog Suivre ce blog
Editer l'article Administration Créer mon blog
occitan-aude.over-blog.com

VINS, CHOCOLATS E MÈL

21 Décembre 2016 , Rédigé par Mirelha

VINS, CHOCOLATS E MÈL

• Per la tasta vins-chocolat de diluns 19 de decembre a l'Ostal Sirventés, un vintenat de personas de la Trivala a Norvègia, de Cavanac a Fabresan, an pogut apreciar :
- los chocolats Nougalet de 5 categorias
- los vins del Domèni La Tour Boisée de Lauran de Menerbés amb lo vinhairon Joan-Loís Podon que presentèt 6 cantinas :

Marselan ; Histoire de famille-Rouge 2015 ; Marielle et Frédérique 2015 ; Marie-Claude-Rouge 2015 ; Jardin secret-2007 ; Jardin secret-2004

https://www.domainelatourboisee.com/

• Los chocolats Nougalet e los vins Tour boisée son en venda a Carcassona al magasin Chez Julien (390 Rue Edouard Branly, fàcia a Décathlon ; www.chez-julien-carcassonne.fr/
• En projècte : una passejada-descobèrta del terrador de Lauran de Menerbés a la prima de 2017 (lo jorn de l'Ascension : 25 de mai?). De seguir…

MÈL E DOÇORS

Dins l'encastre de la Fèsta del Mèl de Carcassona (17-18 de decembre), l'Institut d'Estudis Occitans-Aude a revirat un dotzenat de recèptas a basa de mèl que traparetz çai-jos.
De mai, l'associacion Les Abeilles de l'Aude met a disposicion de caduna e cadun un quarantenat de recèptas a basa de mèl (Las demandar al president de l'associacion l'Abeilel de l'Aude : gerard.dector@gmail.com). Ne traparetz la tièra dins l'article dedicat a la Fèsta del Mèl sus http://cosina-cuisine-ventenac.over-blog.org

Las recèptas

Pomas al forn al mèl d'aspic e brot de romanin
Per 4 personas, vos caldrà : 4 pomas (de las biò) ; 4 biscuèits boudoirs ; 1 culhieron de mèl d'aspic ; 1 brot de romanin ; un culhieron de confiment d'albricòt.
Preparacion : un quart d 'ora. Coseson : 40 minutas

Aprèp aver lavat e eissugat las pomas, tirar mercé a un voida-pomas la part centrala amb las granetas sens traucar la basa de la frucha ; dins un bòl, mesclatz los biscuèits embrenicats amb la mèl, lo romanin capolat e lo confiment. Emplenatz las pomas amb la mescla preparada. Metètz las pomas dins un plat pel forn, ajustatz un pauc d'aiga (dins los 2 cm) e enfornatz per un quarantenat de minutas (180°, T6).
Majofas padenadas al mèl
Per 6 personas, vos caldrà : 800 g de majofas (biologicas), 150 g de mèl d'aspic, 15 cl de vin blanc, 3 dòlças de vanilha
Preparacion : 10 minutas. Coseson : 15 minutas
Lavatz e descoetatz las majofas e botatz-las a secar sus un papièr chucaire. Vojatz lo mèl dins un pade, ajustatz lo vin blanc e menatz al bolh. Daissatz cuèire unas 5 minutas. Fendasclatz la vanilha en dos per ne tirar las granas al cotèl. Ajustatz-las dins lo siròp e contunhatz de faire cuèire per 5 minutas. Ajustatz las majofas dins lo pade, mesclatz docetament per plan enraubar las majofas, puèi daissatz cuèire 3 a 5 minutas a fuòc pichon. Pausatz las majofas dins unas copas e servissètz sul pic. Podètz acompanhar d'una bòla de glacet a la vanilha, de crocants de Sant Paul de Fenolhet o de teules a las amètlas.
Còca al mèl
Per 6 personas, vos caldrà : 130 g de burre, 150 g de mèl liquide de romanin, d'aspic o de montanha, 120 g de farina, mièg-litre de lait entièr, un pecic de sal
Preparacion : 15minutas. Coseson : 55 minutas

Fasètz fondre lo burre e reservatz. Precalfatz lo forn (150°, T5). Burratz vòstre mòtle. Separatz las claras dels mujòls. Batètz los mujòls amb lo mèl e un culhierat d'aiga fins a çò que l'ensemble mosse e vire al blanc. Incorporatz en seguida lo burre fondut, la sal, la farina e lo lait en contunhant de barrejar.
Montatz las claras en nèu que tengue, puèi ajustatz-las delicadament a la pasta amb lo foet sens las espetar. La pasta deu èsser plan liquida e los blancs formar coquèls en susfàcia. Daissatz pausar un quart d'ora, puèi vojatz la pasta obtenguda dins vòstre mòtle. Alisatz la susfàcia amb la lama d'una espatula. E zo ! al forn per mai o mens 55 minutas.
Tiratz la còca del forn (pas de lagui se vos sembla encara tremolar al centre). Botaz al refrigerador per doas oradas. La poiretz atal tirar aisidament del mòtle. Salpicatz de sucre glaça e ornatz amb las cambas de noses abans de servir los convidats.
Crèma brutlada al romanin e al mèl
Per 4 personas, vos caldrà : 20 cl de crèma floreta entira, 20 cl de lait entièr, 4 gròsses mujòls, 3 culhierats de mèl de romanin, dos culhierats de sucre en polvera, un brot de romanin fresc (5 cm), un pauc de cassonada o de sucre per caramelizar.
Precalfatz lo forn a 210°. Faguètz just fremir lait, crèma, mèl e lo brot de romanin. Daissatz infusar unas 10 minutas. D'aquel temps, fasètz blanquir los mujòls amb lo sucre en polvera. Tiratz lo branquet de romanin e vojatz doçamenton la mescla lait-crèma suls mujòls batuts amb lo sucre. Mesclatz plan coma cal mas sens tròp. Partir en 4 ramequins per crèma brutlada. Botatz al forn fins a çò que la crèma prenga (cal plan un quarantenat de minutas). Tiratz los ramequins del forn, los daissatz refregir puèl los botatz al refrigerador.
Al moment de servir, salpicatz las crèmas amb de cassonada o de sucre, puèi fasètz caramelizar (al forn o amb un calamèl).
Bananas al mèl
Per 4 personas, vos caldrà : 4 bananas (biologicas, de segur !), 3 culhierats de mèl totas flors, lo chuc d'un lemon.
Preparacion : 2 minutas ; coseson : 10 minutas.

Fasètz fondre lo mèl dins una caçairòla en i incorporant lo chuc del lemon. Quand la mescla es plan liquida, ajustatz las bananas plumadas e trencadas en 2 dins lo sens de la longor ; daissatz daurar tot docetament las bananas dins la mescla, en las virant de temps en temps (cal comptar dins las 5 minutas). Servissètz sul pic en vojant sus las bananas lo demai de mèl citronat, mas daissatz refregir un momenton abans de tastar se que non : mèfi la cremadura !

Còca a las avelanas, mèl e chocolat
Per 6 personas, vos caldrà : 150 g de chocolat, 3 uòus, 50 g de farina, 100 g de mèl (val mai de cacièr), 100 g de crèma fresca espessa, 125 g d'avelanas en polvera. Napatge al chocolat o al sucre glaça.
Fasètz calfar lo forn a 180° e burratz un mòtle de 20 cm de diamètre. Copar lo chocolat a tròces, puèi lo faire fondre al banh-maria amb 2 culhierats d'aiga. Trencatz los uòus e separatz claras e mujòls. Botatz las claras dins un ensaladièr e los mujòls dins un autre. Batre los mujòls al mesclaire en i ajustant lo mèl, fins a çò que la mescla vengue blanca e mosse. Ajustatz lo chocolat e la crèma. Mesclatz. Batètz las claras en nèu que se tenga, puèi las incorporatz dins la preparacion al chocolat, en alternant amb la farina e la podra d'avelanas. Vojatz dins un mòtle e daissatz cuèire 40 minutas.
Quand es cuèit, sortir la còca del forn e daissatz-la pausar dètz minutas abans de tirar del mòtle. Salpicatz de sucre glaça o napatz al glaçatge de chocolat. Servissètz tebés o freg.

Còca de mèl e d'anogas
Per 8 personas, vos caldrà : 100 g de burre, 100 g de sucre, 160 g de farina, 3 uòus, un saquet de levadura, 150 g d'anogas, 3 culhierats de mèl de montanha, un culhierat de ròm, quauques rasims passarilhats
Preparacion : un quart d'ora ; coseson : tres quarts d'ora.

Batètz lo sucre amb lo burre fondut. Incorportaz mèl, farina e levadura, puèi los uòus. Ajustatz las anogas esclafadas e los rasims. Vojatz la pasta dins un mòtle burrat e enfarinat. Fasètz cuèire dins un forn caud a 180 ° pendent tres quarts d'ora.

Coquetas sabladas a las fruchas confidas e a las anogas crocarèlas al mèl
Per 18 coquetas, vos caldrà
- per la pasta sablada : 225 g de burre doç, 70 g de sucre brun, 280 g de farina e un culhieron de flor de sal
- per las anogas crocarèlas : 170 g de mèl de tardor, dos culhierat de burre, un mièg-culhieron d'extrait de vanilha, un pecic de flor de sal e mièja-liura d'anogas, amètlas e pistachas.
- fruchas confidas a l'idromèl : 165 g de frucha secadas barrejadas (figas, albricòts e rasims) e 60 ml d'idromèl liquorós.
Cobrissètz una placa a bescuèits de papièr sulfurizat. Botatz las fruchas e l'idromèl dins un bòl e mesclatz. Daissatz confir una orada, mas pensatz de remenar un còp l'autre.
Botatz lo mèl e lo burre dins una caçairòla. Fasètz cuèire a fuòc mejan en remenant de longa (8 a 10 minutas). Atudatz lo fuòc e ajustatz dins l'òrdre la vanilha, la flor de sal, las fruchas secas. Mesclatz que las fruchas banhen dins lo mèl.
Tiratz del fuòc e espandissètz la mescla sus la placa preparada. Daissatz refregir una orada. Capolatz lèu-fait las anogas al mèl.
Botatz lo burre e lo sucre dins un bòl. Batètz al foet electric 3 minutas.
Escorrissètz las fruchas, las ajustatz a la mescla e remenatz coma cal. Ajustatz farina e sal e mesclatz a la man pendent una minuta. Incorporatz las anogas capoladas al mèl.
Pausatz la pasta sus un fuèlh de papièr cirat o sulfurizat. Formatz un rotlèu de pasta en quichant amb los dets. Replegatz lo papièr sul rotlèu e rotlatz de tal biais a fargar un cilindre de 6 cm de diamètre. Metètz al refregidor al mens una ora abans la coseson.
Botatz una grasilha al centre del forn. Precalfatz lo forn a 200°. Botatz un novèl fuèlh de papièr sulfurizat sus la placa de las coquetas.
Talhonatz lo cilindre de pasta en rodèlas de 2 cm d'espés. Pausatz las rodèlas sus la placa e fasètz cuèire (12 a 15 minutas). Tiratz del forn e daissatz refregir.

Còca a las cerièras e al mèl
Per 6 personas, vos caldrà : 3 uòus, 120 g de farina, un iogort natura, 100 g de compòsta de pomas non sucrada, 120 g de mèl de montanha o de cacièr, mièg-saquet de levadura quimica, 450 g de cerièras descloscadas e escorridas.
Precalfatz lo forn a 180°. Dins un ensaladièr, mesclatz la farina, la levadura e un pecic de sal. Puèi ajustatz los uòus, la compòsta e lo iogort. Barrejatz plan coma cal lo tot. Ajustatz lo mèl, mesclatz tornarmai, puèi ajustatz las cerièras e mesclatz just per que dintrèssen dins la pasta. Vojatz lo tot dins un mòtle en silicòn e botaz al forn per 40 minutas a 180°. Servissètz un pauc atebesit.

Còca de pomas, mèl e amètlas
Per 6 a 8 personas, vos caldrà : 150 g de farina, 5 culhierats de mèl, 100 g de burre, un saquet de sucre vanilhat, un saquet de levadura quimica, 150 ml de lait, 50 g de podra d'amètla, 3 pomas, amètlas primas, sucre glaça
Preparacion : 10 minutas. Coseson : 15 minutas
Precalfatz lo forn a 180°. Burratz e enfarinatz un plat per tarta. Plumatz las pomas, trencatz-las en 2, enlevatz lo còr e entalhatz sens anar al fons per gardar las mièja-pomas entièras ; reservatz lo temps de preparar la pasta.
Dins un grand bòl, batètz los uòus amb lo sucre vanilhat e lo mèl. Foetatz, puèi ajustatz lo burre fondut. Ajustatz puèi la podra d'amètla e la farina qu'avètz mesclada a la levadura. Mesclatz. Ajustatz lo lait pauc a cha pauc en contunhant de mesclar per obténer una pasta lissa e omogèna. Vojatz la pasta dins un plat a tarta. Pausatz las pomas sus la pasta. Salpicatz amb las amètlas. Al forn per una mièja-orada. A la sortida del forn, salpicatz de sucre glaça.

Figas rostidas a la canèla e al mèl
Per 4 personas, vos caldrà : 16 a 20 figas (4 o 5 per personas), 60 g de burre, 8 culhierats de mèl liquide e doç (cacièr, romanin,…), 4 culhierons de canèla.
Dins un bòl, prestissètz lo burre per l'amolir. Ajustatz lo mèl e la canèla, puèi mesclatz lo tot per aver una pasta plan omogèna. Eissugatz plan coma cal las figas, puèi las entalhar en quatre en partent del pecol sus
de tres parts doas de la nautor. Escartatz los quatre quartièrs delicadament per dobrir coma una flor. Pausatz las figas sus una placa del forn o dins un plat de tarta. Emplenatz cada figa del farçum de mèl e de canèla. Daissatz cuèire 5 minutas dins un forn precalfat a 2010° ; pensatz de cobrir regularament las figas amb lo burre fondut pendent la coseson. Servissètz las figas amb una bòla de glacet vanilha.

Glacet mèl e lemon verd
Per 4 personas, vos caldrà : 2 o 3 lemons verds (cal aver 35 cl de chuc) ; 100 g de mèl de montanha ; 200 g de sucre en polvera ; 2 claras d'uòu ; 100 g de sucre glaça ; 60 cl d'aiga
Preparacion : 20 minutas ; coseson : un quart d'ora ; pausa : mièja-ora
Quichatz los lemons que servaretz aprèp los aver voidats. Fasètz calfar lo chuc obtengut, lo sucre, lo mèl e l'aiga fins a çò que lo sucre fonde a fèt. Puèi, daissatz cuèire un desenat de minutas a pichon bolh. Un còp refregit, mesclatz l'ensemble de temps en temps a la forqueta. Montatz las 2 claras d'uòu en nèu que tenga, ajustatz lo sucre glaça e contunhatz de foetar. Quand lo glacet comença de prene, ajustatz las claras en nèu, mesclatz plan, e zo ! al congelador.
Sortissètz mièja-ora abans de servir. Fasètz bòlas polidetas que n'emplenaretz vòstres mièg-lemons voides. Podètz decorar amb una fuèlha de menta.

Partager cet article

Repost 0

Commenter cet article