Overblog Suivre ce blog
Editer l'article Administration Créer mon blog
occitan-aude.over-blog.com

Amasada generala de l'IEO d'Aude 2015 e l'adieu a Cristian Mas

15 Avril 2015 , Rédigé par Mirelha

Cristian Mas, militant occitanista...

Cristian Mas, militant occitanista...

L'Amassada generala de 2015 de l'Institut d'Estudis Occitans-Aude se tenguèt lo dissabte 28 de març de matin a l'Ostal Sirventés. Se saludèt primièr la memòria de l'Ives Roqueta e del Marcèu Esquieu.

Los participants tornèron sus las activitats de 2014 de l'associacion, prenguèron coneissença d'un bilanç financièr equilibrat, puèi explorèron e completèron lo calendièr de 2015. L'annada serà marcada pel grand recampament per la lenga occitana del dissabte 24 d'octobre a Montpelhièr. L'IEO-Aude participarà activament a la mobilizacion per aquela jornada.

La question de la redefinicion del ròtle, de las competéncias e de la dimension dels territòris es d'actualitat e pòt modificar en prigondor l'accion occitana e associativa. Dins aquel esperit, l'IEO-Aude prendrà part a l'iniciativa Campanada dels Conselhs departamentals cridada per Calandreta.

De mai, la coordinatritz de la Federacion IEO-Lengadòc e lo president e lo director de la Federacion IEO-Miègjorn-Pirenèus animèron un temps fòrt de la matinada sus aquestas questions e lor implicacion sus la vida de las estructures IEO regionalas e departementalas.

La fisança se renovelèt al Conselh d'Administracion, a l'entorn del burèu menat par Miquèl Decòr (president), Chantal Canal (secretària) e Joan-Claudi Bautian (clavaire).

L'ADIEU AL CRISTIAN MAS
Nòstre amic Cristian Mas nos quitèt lo divendres 9 d'abril. Occitanista de tria, militant politic (Volèm Viure Al País, partit Occitan), sòci fisèl de l'IEO-Aude e del Cercle Occitan del país de Carcassona, amb el, Barbacana, Ciutat e Trivala pèrdon tanben una bèla part de memòria. Cristian nos daissarà lo sovenir d'un òme manhac, urós e dobèrt.

« Aviá la bontat sus las pòtas,

e sos uèlhs èran risolièrs

mas, sa mementa sangnava l'òrre

d'unas guèrras de putassièrs. » (Miquèl Decòr)

Las paraulas de Joan-Francés Saisset, Alan Roch, Brunò Peiràs, los cants de Mans de Breish e Claudi Martí, lo Se canta e Aquela Trivala, las bandièras d'Occitania l'acompanhèron al cementèri de La Conta.

L'IEO-Aude e lo Cercle Occitan del País de Carcassona fan part de lor granda pena e del sosten frairal a tota sa familha e a totes sos amics e amigas. Las doas associacions l'acompanhèron un darrièr còp amb una garba de flors rojas e jaunas, amb la mencion : « Cristian : plegarem pas ! ».

Partager cet article

Repost 0

Commenter cet article