Overblog Suivre ce blog
Editer l'article Administration Créer mon blog
occitan-aude.over-blog.com

Cosina locala e viatge al Senegal

18 Février 2015 , Rédigé par Mirelha

Cosina locala e viatge al Senegal
Cosina locala e viatge al Senegal

DOAS PUBLICACIONS NOVÈLAS CÒ DE VENDÉMIAS

En aquesta debuta d'an, l'IEO-Aude publica, dins sa colleccion Vendémias, dos libres Cosina del Quercorb, de Cecília Cuxac ; A l'ombra d'un manguièr, de l'Aurelian de Chaire.

Cosina del Quercorb es la reedicion del libre de recèptas de Cecília Cuxac (primièra publicacion en 1985). Dins lo prefaci, lo capcosinièr Joan-Claudi Rodríguez escriu : “ Aqueste libròt es un vertadièr miralh, reflector de tradicions, de biaisses de viure, de manièras de se noirir. Una vertat espantanta amb las flairas que s’escapan del còl de l’ola ont senhoreja la rosòla. Plan mercé a vos, Dòna, d’aqueste eiretatge que pren plaça dins las colomnas imaginàrias de la cosina del Bonaür Simple.”
Andrieu Lagarda sotalinha, lo gost de l’èime popular e l'inagotable estrambòrd de la Cecília Cuxac.

A vosautres ara de vos congostar e de preparar aquelas recèptas autenticas del terrador : l’aiga bolhida, las sopas (caulets, favas, cebas, coja, galina), la rosòla, lo milhàs de grais, lo polet a l’ast, lo lapin al carrelet, las tripas, l’adòba, la merluça a la quartairòla, lo fricòt de cagarròts, lo tomatat, los camparòls farcits, las aurelhetas, los cocons de pomas, lo tonhòl, las confituras e gelarèas (colindrons, prunas, figas, amoras, codonhs, garravas)... A taula !

 

A l'ombra d'un manguièr

Amb la brocadura A l'ombra d'un manguièr (56 paginas, format A4 ; nombrosas fotografias en N&B ; paginas de cobèrta e quasèrn central : fotografias colors), la colleccion Vendémias de l'Institut d'Estudis Occitans-Aude publica las 23 cronicas que l'Aurelian de Chaire consacrèt als sièis meses passats en 2014 al Senegal cò dels païsans de Casamança per un projècte de solidaritat e de cooperacion agricòla. Abòrda en lenga nòstra mai d'un tèma : l'agricultura locala, lo pes de la mondializacion, la cooperacion internacionala, la colonizacion, l'educacion, las lengas, los rites, los jòcs e espòrts, las fèstas, la cosina, … : « Aquel viatge foguèt la descobèrta d'una cultura diferenta e dels travèrses de la globalizacion qu'en çò nòstre coma endacòm mai capitan de desvalorar los pòbles païsans. A l'ombra d'un manguièr senegalés, posquèri apreciar un biais de viure respectuós de la natura e fòrça uman. »

A aquestas cronicas, s'ajustan unes documents : lo raconte d'una vida de païsan ; la recèpta del Yassà-Polet ; una part linguistica originala  : lexic occitan-pul, provèrbis e poèmas...

Per comandar :

La Cosina : un libre de 64 paginas, 12 èuros (+ 1,50 èuro pel mandadís)

A l'ombra d'un manguièr : 10 € (+ 2,50 € pel mandadís)

Los dos libres : 22 € (franc de pòrt)

IEO-Aude BP 105 11022-Carcassona Cedex

Partager cet article

Repost 0

Commenter cet article